ᱜᱩᱜᱚᱞ ᱛᱚᱨᱡᱚᱢᱟ

1st August 2021

ᱛᱚᱨᱡᱚᱢᱟ ᱫᱚ ᱟᱹᱰᱤ ᱡᱟᱹᱨᱩᱲ ᱠᱟᱹᱢᱤ ᱠᱟᱱᱟ ᱟᱨ ᱟᱵᱚ ᱫᱚ ᱱᱚᱶᱟ ᱞᱚᱠᱰᱟᱩᱱ ᱡᱷᱚᱜ ᱟᱹᱰᱤ ᱠᱷᱟᱹᱞᱤ ᱵᱚᱱ ᱛᱟᱦᱮᱸᱱ ᱠᱟᱱᱟ, ᱪᱮᱫᱟᱜ ᱵᱟᱝ ᱡᱟᱦᱱᱟᱜ ᱠᱟᱹᱢᱤ ᱵᱚᱱ ᱠᱚᱨᱟᱣ ᱢᱟ ᱾ ᱤᱧ ᱥᱟᱱᱛᱟᱲᱤ ᱚᱞ ᱪᱤᱠᱤ ᱞᱤᱯᱤ ᱟᱹᱰᱤ ᱤᱧ ᱠᱩᱥᱤᱭᱟᱜᱼᱟ ᱾ ᱟᱨ ᱤᱧ ᱠᱚᱞᱮᱡᱽ ᱦᱟᱹᱵᱤᱡ ᱚᱞ ᱪᱤᱠᱤ ᱵᱟᱹᱧ ᱵᱟᱲᱟᱭ ᱛᱟᱦᱮᱸᱡ, ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱦᱮᱡ ᱛᱟᱭᱚᱢ ᱤᱧᱟᱜ ᱚᱞ ᱪᱤᱠᱤ ᱪᱮᱫᱚᱜ ᱨᱮᱭᱟᱜ ᱡᱚᱥ ᱟᱨᱦᱚᱸ ᱵᱚᱰᱷᱟᱣ ᱮᱱᱟ ᱾ ᱱᱚᱶᱟ ᱯᱚᱥᱴ ᱨᱮ ᱜᱩᱜᱚᱞ ᱛᱚᱨᱡᱚᱢᱟ ᱫᱟᱵᱚᱛ ᱤᱧ ᱚᱞ ᱵᱟᱲᱟᱭᱟ ᱾ ᱪᱮᱥᱴᱟᱭᱟᱹᱧ ᱫᱤᱱᱜᱮ ᱡᱟᱦᱱᱟᱜ ᱜᱮᱧ ᱚᱞ ᱵᱟᱲᱟᱭᱟ ᱾ ᱟᱨᱦᱚᱸ ᱟᱨ ᱠᱚ ᱠᱟᱛᱷᱟ ᱠᱚᱨᱟᱣ ᱨᱮᱭᱟᱜ ᱢᱟᱱᱟᱜᱼᱟ, ᱛᱮᱦᱮᱸᱧ ᱫᱚ ᱛᱚᱵᱮ ᱤᱱᱟᱹᱜ ᱜᱮ ᱾ ᱤᱧ ᱢᱤᱫᱴᱟᱹᱝ ᱪᱤᱛᱟᱹᱨ ᱤᱧ ᱟᱲᱟᱜ ᱮᱫ ᱛᱟᱵᱚᱱᱟ, ᱚᱱᱟ ᱵᱟᱵᱚᱛ ᱜᱟᱯᱟ ᱤᱧ ᱞᱟᱹᱭ ᱛᱟᱵᱚᱱᱟ ᱾

2nd August 2021

ᱛᱮᱦᱮᱧ ᱫᱚ ᱜᱩᱜᱚᱞ ᱛᱚᱨᱡᱚᱢᱟ ᱨᱮ Evaluate beta translation ᱨᱮ ᱡᱟᱹᱥᱛᱤ ᱠᱟᱹᱢᱤ ᱤᱧ ᱠᱚᱨᱟᱣ ᱠᱮᱜᱼᱟ ᱾ ᱥᱟᱱᱛᱟᱲᱤ ᱯᱚᱛᱚᱵ ᱠᱷᱚᱱ ᱤᱝᱨᱟᱡᱤ ᱟᱹᱭᱟᱹᱛ ᱠᱚ ᱠᱚᱯᱤ ᱯᱮᱥᱴ ᱵᱟᱲᱟ ᱠᱮᱜᱟᱹᱧ ᱾ ᱦᱮᱞᱮ ᱛᱚᱨᱡᱚᱢᱟ ᱫᱚ ᱟᱹᱰᱤ ᱵᱟᱹᱲᱤᱡ ᱜᱮ ᱦᱩᱭ ᱟᱠᱟᱱᱟ ᱾

ᱦᱮᱞᱮ ᱛᱤᱱᱟᱹᱝ ᱜᱟᱱ ᱛᱚᱨᱡᱚᱢᱟ ᱫᱚ ᱴᱷᱤᱠ ᱜᱮ ᱫᱮᱠᱷᱟᱣ ᱮᱫᱟᱭ :-)᱾

3rd August 2021

ᱛᱮᱦᱮᱧ ᱫᱚ ᱩᱱᱟᱹᱜ ᱪᱮᱫ ᱦᱚᱸ ᱵᱟᱹᱧ ᱠᱚᱨᱟᱣ ᱞᱮᱫᱼᱟ ᱾ ᱦᱮᱞᱮ ᱦᱚᱞᱟ ᱟᱹᱭᱩᱵ ᱫᱚ ᱟᱹᱰᱤᱜᱟᱱ ᱤᱧ ᱴᱮᱥᱴ ᱵᱟᱲᱟ ᱠᱮᱜᱼᱟ ᱾ ᱟᱯᱮ ᱯᱮ ᱵᱟᱲᱟᱭᱟ ᱪᱮ, Evaluate beta translation ᱨᱮ ᱟᱯᱮ ᱫᱚ English section ᱨᱮ ᱚᱞ ᱪᱤᱠᱤ ᱛᱮ ᱯᱮ ᱚᱞ ᱫᱟᱲᱮᱭᱟᱜᱼᱟ ᱟᱨ ᱛᱚᱨᱡᱚᱢᱟ ᱯᱮ ᱠᱚᱨᱟᱣ ᱫᱟᱲᱮᱭᱟᱜᱼᱟ ᱾ ᱦᱮᱞᱮ ᱱᱚᱠᱟ ᱠᱚᱠᱟ ᱠᱚᱨᱟᱣ ᱞᱮᱠᱷᱟᱱ ᱫᱚ ᱪᱮᱫ ᱞᱟᱵᱷ ᱾ ᱢᱮᱱᱠᱷᱟᱱ ᱡᱩᱫᱤ ᱟᱯᱮ ᱱᱚᱠᱟ ᱩᱪᱟᱹᱲ ᱱᱟᱪᱟᱲ ᱯᱮ ᱠᱚᱨᱟᱣᱟ ᱢᱮᱱᱠᱷᱟᱱ ᱟᱵᱚ ᱨᱤᱪᱮᱠ ᱫᱟᱲᱮᱭᱟᱜᱼᱟ ᱵᱚ, ᱡᱮ ᱥᱟᱹᱨᱤᱛᱮ ᱜᱩᱜᱚᱞ ᱟᱵᱚᱣᱟᱜ ᱯᱟᱹᱨᱥᱤ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟᱭ ᱥᱮ ᱵᱟᱝᱟ ᱱᱟᱦ ᱾

ᱱᱚᱶᱟ ᱪᱤᱛᱟᱹᱨ ᱧᱮᱞ ᱯᱮᱺ ᱱᱚᱶᱟ ᱨᱮ ᱫᱚ ᱦᱤᱱᱫᱤ ᱚᱞ ᱫᱚ ᱵᱷᱩᱞ "English" ᱯᱟᱦᱴᱟ ᱨᱮ ᱯᱮᱥᱴ ᱟᱠᱟᱫᱟᱹᱧ ᱾ ᱦᱮᱞᱮ ᱛᱮᱞᱟ ᱫᱚ ᱤᱱᱟᱹ ᱜᱮ ᱫᱮᱠᱷᱟᱣᱮᱫᱟᱭ ᱾

ᱱᱤᱛᱚᱜ ᱱᱚᱶᱟ ᱞᱟᱛᱟᱨ ᱪᱤᱛᱟᱹᱨ ᱧᱮᱞ ᱯᱮᱺ ᱱᱚᱶᱟ ᱨᱮ ᱫᱚ ᱥᱟᱱᱛᱟᱲᱤ ᱨᱮ "ᱧᱤᱚᱛ" ᱫᱚ ᱵᱷᱩᱞ "English" ᱯᱟᱦᱴᱟ ᱨᱮ ᱯᱮᱥᱴ ᱟᱠᱟᱫᱟᱹᱧ ᱾ ᱦᱮᱞᱮ ᱛᱮᱞᱟ ᱫᱚ ᱵᱷᱮᱜᱟᱨ ᱜᱮ ᱫᱮᱠᱷᱟᱣᱮᱫᱟᱭ ᱾ ᱢᱮᱱᱠᱷᱟᱱ ᱟᱵᱚ ᱫᱚ ᱡᱷᱚᱛᱚ ᱵᱚᱱ "ᱛᱷᱟᱹᱢᱵ ᱰᱟᱩᱱ" ᱟ ᱟᱨ ᱚᱠᱟ ᱯᱩᱨᱟ ᱯᱩᱨᱤ ᱢᱮᱪᱟᱭ ᱚᱱᱟ ᱵᱚᱱ ᱴᱷᱤᱠᱟ ᱾ ᱢᱤᱫᱴᱟᱹᱝ ᱰᱚᱴ ᱦᱚᱸ ᱦᱮᱡ ᱞᱮᱠᱷᱟᱱ ᱵᱷᱩᱞ ᱠᱟᱜ ᱠᱟᱛᱷᱟ ᱾

ᱛᱚ ᱱᱤᱛᱚᱜ ᱫᱚ ᱵᱤᱴᱟ ᱢᱳᱰ ᱨᱮ ᱢᱮᱱᱟᱜ ᱛᱟᱵᱚᱱᱟ ᱾ ᱟᱵᱚ ᱴᱷᱮᱱ ᱱᱤᱛᱚᱜ ᱚᱠᱛᱚ ᱢᱮᱱᱟᱜᱼᱟ ᱾ ᱵᱷᱩᱞ ᱠᱚ ᱵᱚᱱ ᱥᱩᱫᱽᱷᱨᱟᱹᱣᱟ ᱾

4th August 2021

ᱡᱷᱚᱛᱚ ᱦᱚᱲ ᱴᱷᱮᱱ ᱱᱚᱦᱚᱨ ᱛᱟᱦᱮᱸᱱ ᱠᱟᱱᱟ, ᱫᱟᱭᱟ ᱠᱟᱛᱮ ᱚᱞ ᱪᱤᱠᱤ ᱛᱮ ᱜᱩᱜᱚᱞ ᱛᱚᱨᱡᱚᱢᱟ ᱨᱮ ᱟᱯᱮᱭᱟᱜ ᱭᱩᱜᱽᱫᱟᱱ ᱮᱢᱚᱜ ᱯᱮ ᱾ ᱟᱸᱱᱴ ᱯᱮ ᱵᱩᱡᱷᱟᱹᱣ ᱨᱮ ᱦᱚᱸ ᱵᱷᱮᱜᱟᱨ ᱯᱟᱹᱨᱥᱤ ᱛᱮ ᱟᱞᱚᱯᱮ ᱮᱢᱟ ᱾ ᱱᱤᱛᱚᱜ ᱫᱚ ᱵᱮᱴᱟ ᱨᱮ ᱢᱮᱱᱟᱜᱼᱟ ᱢᱮᱱᱠᱷᱟᱱ ᱫᱚ ᱟᱵᱚ ᱡᱩᱫᱤ ᱞᱚᱜᱚᱱ ᱜᱮ ᱞᱟᱭᱤᱵᱽ ᱵᱚᱱ ᱟᱹᱜᱩ ᱪᱷᱚᱭᱟ ᱢᱮᱱᱠᱷᱟᱱ ᱫᱚ ᱟᱵᱚ ᱱᱤᱦᱟᱹᱛᱤ ᱠᱩᱨᱩᱢᱩᱴᱩ ᱵᱚᱱ ᱪᱷᱩᱴᱟᱹᱣ ᱠᱚ ᱨᱮᱭᱟᱱ ᱠᱟᱛᱷᱟ ᱾

7th August 2021

ᱱᱚᱠᱟ ᱜᱮ ᱵᱟᱹᱭ ᱵᱟᱹᱭ ᱛᱮ ᱵᱚᱱ ᱞᱟᱦᱟᱜᱼᱟ ᱾ ᱜᱩᱜᱚᱞ ᱛᱚᱨᱡᱚᱢᱟ ᱫᱚ ᱢᱤᱫ ᱡᱮᱠᱷᱟ ᱡᱩᱫᱤ ᱥᱟᱱᱛᱟᱲᱤ ᱦᱟᱛᱟᱣ ᱞᱮᱠᱷᱟᱱ ᱫᱚ ᱟᱵᱚ ᱥᱟᱱᱛᱟᱲᱤ ᱠᱚᱢᱭᱩᱱᱤᱴᱭ ᱞᱟᱹᱜᱤᱫ ᱟᱹᱰᱤ ᱜᱚᱨᱚᱵ ᱨᱮᱭᱟᱜ ᱠᱟᱛᱷᱟ ᱛᱟᱦᱮᱸᱱᱟ ᱾ ᱟᱵᱚ ᱠᱚ ᱨᱤᱱ ᱥᱟᱱᱛᱟᱲᱤ ᱵᱚᱭᱦᱟ, ᱥᱟᱱᱛᱟᱲᱤ ᱫᱟᱹᱭ, ᱥᱟᱱᱛᱟᱲᱤ ᱜᱤᱫᱽᱨᱟᱹ ᱟᱹᱰᱤ ᱞᱟᱵᱷ ᱠᱚ ᱧᱟᱢᱟᱺ

ᱢᱟ ᱛᱚᱵᱮ ᱪᱮᱫ ᱞᱟᱵᱷ ᱭᱟ ᱵᱚᱱ ᱧᱟᱢᱟᱺ

᱑᱾ ᱥᱟᱱᱛᱟᱲᱤ ᱛᱮ ᱚᱞ ᱯᱟᱲᱦᱟᱣ ᱼ ᱡᱟᱦᱱᱟᱜ ᱛᱚᱨᱡᱚᱢᱟ ᱠᱚ ᱵᱚᱱ ᱜᱟᱱ ᱫᱟᱲᱮᱭᱟᱜᱼᱟ ᱾ ᱡᱮᱛᱮᱛ ᱨᱮᱭᱟᱜ ᱑᱑᱐ ᱠᱷᱚᱱ ᱰᱷᱮᱨ ᱢᱟᱨᱟᱝ ᱢᱟᱨᱟᱝ ᱯᱟᱹᱨᱥᱤ ᱠᱷᱚᱱ (ᱡᱮᱢᱚᱱᱺ ᱨᱩᱥ, ᱪᱟᱩᱱᱤᱡᱽ ᱟᱫᱤ) ᱟᱵᱚ ᱚᱴᱚᱢᱮᱴᱤᱠ ᱛᱚᱨᱡᱚᱢᱟ ᱜᱟᱱ ᱫᱟᱲᱮᱭᱟᱜᱼᱟ ᱵᱚᱱ ᱾ ᱤᱱᱴᱚᱨᱱᱮᱥᱱᱟᱞᱭ ᱟᱵᱚᱣᱟᱜ ᱯᱟᱹᱨᱥᱤ ᱡᱮᱜᱮᱛ ᱫᱤᱥᱚᱢ ᱨᱤᱱ ᱦᱚᱲ ᱠᱚ ᱵᱟᱲᱟᱭ ᱧᱟᱢᱟ ᱾

᱒᱾ ᱵᱤᱡᱽᱱᱮᱥ ᱵᱚᱱ ᱠᱚᱨᱟᱣ ᱫᱟᱲᱮᱭᱟᱜᱼᱟ ᱼ ᱦᱚᱭ, ᱟᱯᱮ ᱵᱟᱯᱮ ᱵᱟᱲᱟᱭᱟ ᱯᱟᱞᱮᱱ ᱾ ᱜᱩᱜᱚᱞ ᱫᱚ ᱢᱟᱲᱟᱝ ᱠᱷᱚᱱ ᱢᱟᱱᱭᱚᱛᱟ ᱮᱢ ᱠᱟᱫ (᱑᱐᱙ ᱯᱟᱹᱨᱥᱤ) ᱯᱟᱹᱨᱥᱤ ᱠᱚ ᱪᱷᱚᱲᱟ ᱟᱨ ᱚᱠᱟ ᱯᱟᱹᱨᱥᱤ ᱦᱚᱸ ᱜᱩᱜᱚᱞ ᱮᱰᱥᱮᱱᱥ ᱨᱮ ᱯᱩᱥᱟᱹ ᱠᱚᱢᱟᱣ ᱞᱟᱹᱜᱤᱫ ᱚᱫᱷᱤᱠᱟᱨ ᱵᱟᱭ ᱮᱢᱟ ᱠᱚᱟᱭ ᱾ ᱢᱮᱱᱠᱷᱟᱱ ᱥᱟᱱᱛᱟᱲᱤ ᱡᱩᱫᱩ ᱜᱩᱜᱚᱞ ᱛᱚᱨᱡᱚᱢᱟ ᱨᱮ ᱦᱟᱹᱡᱩᱜ ᱠᱷᱟᱱ ᱫᱚ ᱟᱵᱚ ᱥᱟᱱᱛᱟᱲᱤ ᱨᱮ ᱵᱞᱚᱜᱽ ᱠᱟᱛᱮ ᱯᱩᱭᱥᱟᱹ ᱵᱚᱱ ᱠᱚᱢᱟᱣ ᱫᱟᱲᱮᱭᱟᱜᱼᱟ ᱾ ᱢᱮᱱᱠᱷᱟᱱ ᱤᱧᱟᱜ ᱮᱠᱟᱩᱱᱴ ᱨᱮ ᱦᱚᱸ ᱮᱰᱥᱮᱱᱥ ᱫᱚ ᱤᱝᱨᱟᱡᱤ ᱯᱟᱹᱨᱥᱤ ᱞᱟᱹᱜᱤᱫ ᱜᱮ ᱮᱯᱨᱩᱣᱟᱞ ᱮ ᱧᱟᱢ ᱟᱠᱟᱫᱟᱭ ᱾

᱓᱾ ᱥᱠᱨᱤᱯᱴ ᱣᱟᱨ ᱼ ᱱᱚᱛᱟᱨ ᱨᱮᱭᱟᱜ ᱡᱩᱜᱽ ᱨᱮ ᱯᱟᱹᱨᱥᱤ ᱠᱚ ᱛᱟᱞᱟ ᱨᱮ ᱜᱮ ᱥᱠᱨᱤᱯᱴ ᱨᱮᱭᱟᱜ ᱠᱚᱱᱯᱷᱭᱩᱡᱚᱱ ᱢᱮᱱᱟᱜ ᱜᱮᱭᱟ ᱾ ᱦᱮᱞᱮ ᱜᱩᱜᱚᱞ ᱫᱚ ᱠᱷᱟᱹᱞᱤ ᱢᱤᱫᱴᱟᱹᱝ ᱥᱠᱨᱤᱯᱴ ᱜᱮ ᱦᱟᱛᱟᱣᱟᱭ ᱾ ᱵᱷᱮᱜᱟᱨ ᱥᱠᱨᱤᱯᱴ ᱛᱮ ᱦᱚᱸ ᱜᱟᱱᱚᱜ ᱜᱮᱭᱟ ᱦᱮᱞᱮ ᱯᱷᱤᱨ ᱱᱟᱶᱟ ᱥᱠᱨᱤᱯᱴ ᱞᱟᱹᱜᱤᱫ ᱯᱷᱤᱰᱵᱮᱠ ᱮᱢ ᱛᱮ ᱦᱩᱭᱩᱜᱼᱟ ᱾ ᱟᱨ ᱜᱩᱜᱚᱞ ᱫᱚ ᱚᱝᱠᱟ ᱫᱚ ᱯᱨᱟᱭ ᱵᱟᱭ ᱠᱚᱨᱟᱣ ᱥᱮᱱᱟᱭᱟ ᱾

᱔᱾ ᱞᱚᱜᱚᱱ ᱪᱟᱹᱠᱨᱤ ᱵᱚᱱ ᱧᱟᱢᱟ ᱼ ᱢᱮᱱᱠᱷᱟᱱ ᱥᱟᱱᱛᱟᱲᱟᱤ ᱢᱮᱱᱛᱮ ᱱᱟᱶᱟ ᱯᱟᱹᱨᱥᱤ ᱦᱟᱹᱡᱩᱜ ᱠᱷᱟᱱ ᱫᱚ ᱡᱮᱜᱮᱛ ᱥᱟᱨᱟ ᱠᱚ ᱵᱟᱲᱟᱭᱟ ᱾ ᱟᱨ ᱜᱩᱜᱚᱞ ᱛᱚᱨᱡᱚᱢᱟ ᱫᱚ ᱩᱱᱟᱹᱜ ᱵᱟᱭ ᱥᱚᱴᱷᱤᱠ ᱟᱭ ᱾ ᱢᱮᱱᱠᱷᱟᱱ ᱯᱨᱩᱯᱷᱨᱤᱰᱚᱨ ᱞᱟᱹᱜᱤᱫ ᱟᱨᱦᱚᱸ ᱠᱟᱹᱢᱤ ᱵᱚᱱ ᱧᱟᱢᱟ ᱾

᱕᱾ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱼ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱨᱮ ᱟᱨᱦᱚᱸ ᱟᱭᱢᱟ ᱟᱨᱴᱤᱠᱟᱹᱞ ᱠᱚ ᱵᱚᱱ ᱯᱟᱹᱵᱞᱤᱥ ᱫᱟᱲᱮᱭᱟᱜᱼᱟ ᱾

ᱟᱨᱦᱚᱸ ᱚᱝᱠᱟ ᱟᱭᱢᱟ ᱡᱤᱱᱤᱥ ᱢᱮᱱᱟᱜᱼᱟ ᱚᱠᱟ ᱫᱚ ᱟᱹᱰᱤ ᱠᱟᱹᱢᱤ ᱨᱮ ᱦᱟᱹᱡᱩᱜ ᱛᱟᱵᱚᱱᱟ ᱾ ᱢᱮᱱᱠᱷᱟᱱ ᱠᱷᱟᱹᱞᱤ ᱚᱠᱛᱚ ᱯᱚ ᱧᱟᱢ ᱠᱷᱟᱱ ᱱᱚᱶᱟ ᱠᱚᱨᱮ ᱪᱷᱩᱴᱟᱹᱣᱜ ᱛᱟᱵᱚᱱ ᱯᱮ ᱾ ᱡᱮᱛᱮ ᱡᱟᱹᱥᱛᱤ ᱵᱚᱱ ᱠᱟᱹᱢᱤᱭᱟ ᱩᱱᱟᱹᱜ ᱞᱚᱜᱚᱱ ᱵᱚᱱ ᱟᱹᱜᱩ ᱪᱷᱚᱭᱟ ᱾

19th August 2021

ᱵᱟᱨ ᱫᱤᱱ ᱛᱟᱭᱟᱢ ᱯᱟᱞᱮ ᱯᱮ ᱧᱮᱞ ᱨᱟᱵᱟᱠ ᱟᱠᱟᱫᱼᱟ, ᱜᱩᱜᱚᱞ ᱛᱚᱨᱡᱚᱢᱟ ᱨᱮᱭᱟᱜ ᱟᱭᱠᱚᱱ ᱠᱚ ᱵᱚᱫᱚᱞ ᱠᱚᱜᱼᱟ ᱾ ᱢᱟᱲᱟᱝ ᱫᱚ ᱨᱚᱝᱜᱤᱱ ᱴᱮᱵᱽ ᱠᱚ ᱛᱟᱦᱮᱸ ᱠᱟᱱᱟ ᱾ ᱱᱤᱛᱚᱜ ᱫᱚ ᱤᱣᱟᱞᱩᱮᱴ ᱵᱤᱴᱟ ᱴᱨᱟᱱᱥᱞᱮᱥᱚᱱ, ᱣᱮᱞᱤᱰᱮᱴ ᱴᱨᱟᱱᱥᱞᱮᱥᱚᱱ ᱯᱷᱚᱨ ᱮᱠᱭᱩᱨᱮᱥᱭ, ᱟᱨ ᱴᱨᱟᱱᱥᱞᱮᱴ ᱣᱟᱨᱰᱥ ᱮᱸᱱᱰ ᱯᱷᱨᱮᱡᱽ ᱨᱮ ᱡᱷᱚᱛᱚ ᱟᱭᱠᱚᱱ ᱠᱚ ᱞᱤᱞ ᱪᱷᱚ ᱠᱮᱜᱼᱟ ᱠᱚ ᱾ ᱱᱚᱶᱟ ᱰᱤᱡᱟᱭᱤᱱ ᱨᱮ ᱟᱵᱚ ᱱᱟᱶᱟᱚ ᱡᱚᱥ ᱛᱮ ᱵᱚᱱ ᱞᱟᱦᱟᱜ ᱢᱟ ᱾

27th August 2021

ᱜᱩᱜᱚᱞ ᱛᱚᱨᱡᱚᱢᱟ ᱥᱟᱶ ᱟᱨᱦᱚᱸ ᱟᱭᱢᱟ ᱯᱟᱹᱨᱥᱤ ᱠᱚ ᱢᱮᱱᱟᱜᱼᱟ ᱚᱠᱟ ᱫᱚ ᱵᱮᱴᱟ ᱛᱚᱨᱢᱚᱨᱟ ᱨᱮ ᱱᱤᱛᱚᱜ ᱢᱮᱱᱟᱜᱼᱟ ᱾

19 September 2021

ᱱᱤᱛ ᱫᱷᱟᱹᱵᱤᱡ ᱛᱮ ᱫᱚ ᱜᱚᱜᱚᱞ ᱛᱚᱨᱡᱚᱢᱟ ᱨᱮ 2,69,700 ᱜᱟᱱ ᱮᱢᱮᱢ ᱦᱩᱭ ᱠᱟᱱᱟ ᱾ ᱟᱨᱦᱚᱸ ᱚᱝᱠᱟ ᱜᱮ ᱵᱚᱱ ᱪᱷᱩᱴᱟᱹᱣ ᱠᱚᱜ ᱢᱟ, ᱢᱤᱫ ᱫᱤᱱ ᱱᱚᱶᱟ ᱟᱵᱚᱣᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱱᱤᱦᱟᱹᱛᱤ ᱵᱚᱱ ᱟᱹᱜᱩ ᱪᱷᱚᱭᱟ ᱾ ᱜᱩᱜᱚᱞ ᱫᱚ ᱱᱤᱛᱚᱜ ᱟᱭᱢᱟ ᱯᱟᱹᱨᱥ ᱢᱤᱫ ᱡᱮᱠᱷᱟ ᱛᱮ ᱥᱮᱞᱮᱫ ᱥᱮᱱᱟᱭ ᱠᱟᱱᱟ, ᱚᱱᱟ ᱠᱷᱟᱹᱛᱤᱨ ᱛᱮ ᱟᱯᱮ ᱡᱩᱫᱤ ᱤᱝᱨᱟᱡᱤ ᱣᱤᱠᱤᱯᱤᱰᱤᱭᱟ ᱨᱮᱭᱟᱜ Google Translate ᱥᱟᱦᱴᱟ ᱨᱮ ᱯᱮ ᱪᱟᱞᱟᱜᱼᱟ ᱠᱷᱟᱱ ᱫᱚ ᱯᱮ ᱧᱟᱞᱧᱟᱢ ᱫᱟᱲᱮᱭᱟᱜᱼᱟ, ᱥᱟᱱᱛᱟᱲᱤ ᱥᱟᱶ ᱟᱭᱢᱟ ᱯᱟᱹᱨᱤᱥ ᱦᱚᱸ ᱟᱠᱚᱣᱟᱜ ᱞᱟᱭᱤᱱ ᱨᱮ ᱢᱮᱱᱟᱜ ᱠᱚᱣᱟ ᱾ ᱩᱱᱠᱩ ᱦᱚᱸ ᱟᱵᱚ ᱞᱮᱠᱷᱟ ᱠᱚ ᱪᱷᱩᱴᱟᱹᱣᱜ ᱠᱟᱱᱟ ᱾

3rd December 2021

ᱡᱚᱦᱟᱨ, ᱱᱤᱛ ᱫᱷᱟᱹᱵᱤᱡ ᱛᱮ ᱫᱚ ᱜᱩᱜᱚᱞ ᱛᱚᱨᱡᱚᱢᱟ ᱵᱟᱹᱭ ᱵᱟᱹᱭ ᱛᱮ ᱪᱮᱫ ᱤᱫᱤᱭ ᱟᱭ᱾ ᱟᱨ ᱟᱭᱢᱟ ᱥᱟᱨᱦᱟᱣ ᱪᱟᱞ ᱟᱠᱚ ᱠᱟᱹᱱᱟᱹᱧ ᱡᱟᱦᱟᱸᱭ ᱫᱚ ᱱᱚᱶᱟ ᱯᱟᱹᱨᱥᱤ ᱨᱮ ᱱᱤᱡᱚᱨ ᱮᱱᱮᱢ ᱠᱚ ᱮᱢᱚᱜ ᱠᱟᱱᱟ᱾ ᱱᱟᱶᱟ ᱜᱩᱜᱚᱞ ᱛᱚᱨᱡᱚᱢᱟ ᱦᱮᱡ ᱞᱮᱠᱷᱟᱱ ᱟᱵᱚ ᱟᱹᱰᱤ ᱞᱟᱹᱵᱷ ᱵᱚᱱ ᱧᱟᱢᱟ, ᱡᱮᱜᱮᱛ ᱥᱟᱨᱟ ᱨᱮ ᱟᱵᱚ ᱞᱟᱹᱨᱥᱤ ᱦᱚᱲ ᱠᱚ ᱵᱟᱲᱟᱭ ᱧᱟᱢᱟ᱾ ᱩᱱᱠᱩ ᱱᱟᱶᱟ ᱯᱟᱹᱨᱥᱤ ᱠᱷᱚᱱ ᱮᱴᱟᱜ ᱯᱟᱹᱨᱥᱤ ᱛᱮ ᱦᱚᱸ ᱛᱚᱨᱡᱚᱢᱟ ᱫᱟᱲᱮᱭᱟᱜᱼᱟ ᱠᱚ᱾ ᱡᱮᱢᱚᱱ ᱡᱟᱦᱟᱸᱭ ᱜᱮ ᱥᱟᱱᱛᱟᱲ ᱠᱷᱚᱱ ᱤᱝᱨᱟᱡᱤ, ᱟᱨ ᱵᱟᱝ ᱥᱯᱮᱱᱤᱥ ᱞᱮᱠᱷᱟ ᱟᱭᱢᱟᱸ ᱯᱟᱹᱨᱥᱤ ᱛᱮ ᱛᱚᱨᱡᱚᱢᱟ ᱠᱚᱨᱟᱣ ᱫᱟᱲᱮᱭᱟᱜᱼᱟᱭ᱾ ᱤᱧ ᱤᱪᱷᱟᱹᱭᱟᱹᱧ ᱞᱚᱜᱚᱱ ᱜᱮ ᱱᱟᱦ ᱟᱵᱚᱣᱟᱜ ᱯᱟᱹᱨᱥᱤ ᱠᱚ ᱥᱮᱞᱮᱫ ᱛᱟᱵᱚ ᱢᱟᱸ᱾ ᱤᱧ ᱦᱚᱸ ᱡᱩᱨᱼᱥᱩᱨ ᱛᱮ ᱛᱚᱨᱡᱚᱢᱟ ᱠᱚᱨᱟᱣ ᱨᱮ ᱢᱮᱱᱟᱹᱧᱼᱟ᱾

27th March 2022

ᱟᱹᱰᱤ ᱫᱤᱱ ᱦᱩᱭᱮᱱᱟ ᱤᱧ ᱫᱚ ᱱᱤᱛ ᱵᱟᱹᱧ ᱚᱞ ᱟᱠᱟᱫᱼᱟ, ᱦᱟᱱᱟ ᱱᱟᱶᱟ ᱠᱟᱹᱢᱤ ᱨᱮ ᱵᱤᱡᱤ ᱧᱚᱜ ᱤᱧ ᱛᱟᱦᱮᱸ ᱞᱮᱱᱟ ᱾ ᱜᱩᱜᱚᱞ ᱛᱮᱨᱡᱚᱢᱟ ᱫᱚ ᱟᱹᱰᱤᱜᱟᱱ ᱥᱚᱢᱚᱭ ᱤᱫᱤ ᱫᱟᱲᱮᱭᱟᱜᱼᱟᱭ ᱾ ᱢᱮᱱᱠᱷᱟᱱ ᱚᱱᱟ ᱠᱷᱟᱹᱛᱤᱨ ᱚᱱᱟ ᱵᱚᱫᱚᱞ ᱛᱮ ᱢᱤᱫ ᱱᱟᱶᱟ ᱯᱞᱟᱴᱯᱷᱚᱨᱢ ᱤᱧ ᱧᱟᱢ ᱚᱰᱚᱠ ᱟᱠᱟᱫᱼᱟ ᱾ ᱢᱮᱱᱠᱷᱟᱱ ᱤᱧ ᱫᱚ ᱟᱹᱰᱤ ᱢᱟᱲᱟᱝ ᱠᱷᱚᱱ ᱱᱚᱶᱟ ᱨᱮ ᱪᱷᱩᱴᱟᱹᱣᱜ ᱠᱟᱱ ᱛᱟᱦᱮᱸᱡ ᱟᱹᱧ ᱾ ᱱᱚᱶᱟ ᱨᱮᱭᱟᱜ ᱞᱤᱝᱠ ᱫᱚ ᱱᱚᱰᱮ ᱵᱟᱹᱭᱥᱟᱹᱣ ᱠᱟᱜ ᱠᱟᱹᱱᱟᱹᱧ ᱾ ᱚᱱᱟ ᱥᱚᱯᱷᱴᱣᱮᱨ ᱨᱮᱭᱟᱜ ᱧᱩᱛᱩᱢ ᱫᱚ Apertium ᱠᱚ ᱢᱮᱛᱟᱜᱼᱟ, ᱱᱚᱰᱮ ᱪᱟᱞᱟᱣ ᱠᱟᱛᱮ ᱞᱮᱝᱜᱟ ᱛᱤ ᱯᱟᱦᱴᱟ ᱨᱮ ᱤᱝᱨᱟᱡᱤ ᱟᱨ ᱡᱚᱡᱚᱢ ᱛᱤ ᱯᱟᱦᱴᱟ ᱨᱮ ᱥᱟᱱᱛᱟᱲᱤ ᱫᱚᱦᱚ ᱠᱟᱛᱮ ᱛᱟᱨᱡᱚᱢᱟ ᱜᱟᱱᱚᱜ ᱠᱟᱱᱟ ᱾ ᱢᱮᱱᱠᱷᱟᱱ ᱱᱤᱛᱚᱜ ᱫᱚ ᱴᱷᱤᱠ ᱥᱮ ᱵᱟᱭ ᱥᱮᱴ ᱠᱟᱱᱟ ᱱᱤᱭᱚᱢ ᱟᱨ ᱟᱹᱲᱟᱹ ᱠᱚ ᱥᱮᱞᱮᱫ ᱨᱮᱭᱟᱜ ᱠᱟᱹᱢᱤ ᱦᱚᱸ ᱟᱹᱰᱤᱜᱟᱱ ᱢᱮᱱᱟᱜᱼᱟ ᱾ ᱢᱮᱱᱠᱷᱟᱱ ᱡᱟᱦᱟᱹᱭ ᱠᱚ ᱠᱟᱹᱢᱤ ᱥᱮᱱᱟ ᱯᱮ ᱠᱟᱱᱟ ᱚᱱᱟ ᱣᱮᱵᱽᱥᱟᱭᱤᱴ ᱨᱮ ᱪᱟᱞᱟᱣ ᱠᱟᱛᱮ ᱡᱟᱹᱥᱛᱤ ᱯᱮ ᱵᱟᱲᱟᱭ ᱫᱟᱲᱮᱭᱟᱜᱼᱟ ᱾

ᱰᱮᱢᱳ : Apertium English to Santali

08th August 2022

ᱟᱹᱰᱤ ᱫᱤᱱ ᱦᱩᱭᱮᱱᱟ ᱵᱟᱹᱧ ᱚᱞ ᱠᱟᱫᱟ ᱾ ᱱᱤᱭᱟᱹ ᱯᱤᱱ ᱢᱟᱦᱟᱸ ᱨᱮ ᱫᱚ ᱟᱹᱰᱤᱜᱟᱱ ᱡᱤᱱᱤᱥ ᱤᱧ ᱵᱟᱲᱟᱭ ᱠᱮᱜᱼᱟ ᱾ ᱡᱮᱞᱠᱟ ᱜᱩᱜᱚᱞ ᱵᱟᱵᱚᱛ ᱾ ᱱᱚᱶᱟ ᱯᱚᱥᱴ ᱨᱮ ᱫᱚ ᱩᱱᱟᱹᱜ ᱵᱟᱹᱧ ᱞᱟᱹᱭᱟ ᱾ ᱵᱟᱠᱤ ᱤᱧ ᱢᱮᱱᱟ ᱡᱮ ᱟᱹᱰᱤ ᱞᱚᱜᱚᱱ ᱚᱞ ᱪᱤᱠᱤ ᱩᱱᱱᱚᱛ ᱤᱫᱤ ᱮᱫᱟᱭ ᱾ ᱪᱟᱞᱟᱣᱮᱱ ᱪᱟᱱᱫᱚ ᱠᱚᱨᱮ ᱟᱹᱰᱤ ᱱᱟᱶᱟᱼᱱᱟᱶᱟ ᱴᱮᱠᱱᱚᱞᱚᱡᱭ ᱠᱚ ᱮᱢᱟᱱ ᱦᱮᱡ ᱮᱱᱟ ᱡᱟᱦᱟᱸ ᱛᱮ ᱟᱵᱚ ᱫᱚ ᱤᱝᱜᱽᱨᱟᱡᱤ ᱠᱷᱚᱱ ᱥᱟᱱᱛᱟᱲᱤ ᱛᱮ ᱛᱚᱨᱡᱚᱢᱟ ᱵᱚᱱ ᱜᱟᱱ ᱫᱟᱲᱮᱭᱟᱜᱼᱟ ᱾ ᱡᱮᱞᱠᱟ NLLB (No Language Left Behind) ᱡᱟᱦᱟᱸ ᱫᱚ Hugging-Face ᱰᱮᱢᱳ ᱞᱮᱠᱷᱟ ᱛᱮ 200 ᱜᱟᱱ ᱯᱟᱹᱨᱥᱤ ᱛᱮ ᱛᱚᱨᱡᱚᱢᱟ ᱠᱚ ᱮᱢᱟᱱ ᱜᱟᱱᱚᱜ ᱜᱮᱭᱟ ᱾ ᱚᱱᱟ ᱣᱮᱵᱽᱥᱟᱭᱤᱴ ᱨᱮ ᱪᱟᱞᱟᱣ ᱠᱟᱛᱮ ᱡᱩᱫᱤ ᱤᱝᱜᱽᱨᱟᱡᱤ (en_Latin) ᱫᱚ source language ᱨᱮ ᱫᱚᱦᱚ ᱠᱟᱛᱮ ᱟᱨ target language ᱡᱩᱫᱤ ᱥᱟᱱᱛᱟᱲᱤ (sat_Beng) ᱵᱟᱪᱷᱟᱣ ᱠᱟᱛᱮ ᱥᱟᱹᱵᱢᱤᱴ ᱞᱮᱠᱷᱟᱱ ᱫᱚ ᱟᱹᱰᱤ ᱱᱟᱯᱟᱭ ᱛᱚᱨᱡᱚᱢᱟ ᱫᱮᱠᱷᱟᱣ ᱮᱫᱟᱭ ᱾ ᱢᱮᱱᱠᱷᱟᱱ ᱯᱟᱹᱨᱥᱤ ᱠᱳᱰ ᱨᱮ ᱱᱟᱥᱮ ᱦᱩᱰᱟᱹᱜ ᱢᱮᱱᱟᱜ ᱜᱮᱭᱟ ᱾ ᱯᱟᱞᱮ ᱛᱟᱭᱚᱢ ᱛᱮ ᱚᱱᱟ ᱠᱚ ᱴᱷᱤᱠ ᱜᱮᱭᱟ ᱱᱟᱦ ᱾ ᱚᱞ ᱪᱤᱠᱤ ᱛᱮ ᱚᱞ ᱫᱚ ᱟᱹᱰᱤ ᱠᱩᱥᱤᱭᱟᱜ ᱠᱟᱹᱱᱟᱹᱧ, ᱦᱟᱱᱟ ᱢᱟᱦᱟᱸ ᱨᱮ ᱥᱨᱤᱯᱚᱛᱤ ᱴᱩᱰᱩ ᱜᱚᱢᱠᱮ ᱛᱤᱠᱤᱱᱟᱜ ᱧᱩᱛᱩᱢ ᱢᱚᱫᱤ ᱥᱚᱨᱠᱟᱨ ᱤᱫᱤ ᱞᱮᱜᱼᱟᱭ ᱾ ᱥᱨᱤᱯᱚᱛᱤ ᱜᱚᱢᱠᱮ ᱛᱤᱠᱤᱱ ᱫᱚ ᱱᱟᱦ ᱥᱟᱱᱛᱟᱲᱤ ᱛᱮ ᱵᱷᱟᱨᱚᱛ ᱨᱮᱭᱟᱜ ᱥᱚᱝᱵᱤᱫᱷᱟᱱ ᱠᱤᱱ ᱛᱚᱨᱡᱚᱢᱟ ᱞᱮᱫᱟ, ᱚᱱᱟ ᱯᱚᱛᱚᱵ ᱫᱚ ᱱᱤᱛᱚᱜ ᱤᱧ ᱴᱷᱮᱱ ᱢᱮᱱᱟᱜᱼᱟ ᱾ ᱡᱮᱞᱠᱟ ᱤᱧ ᱵᱟᱲᱟᱭ ᱠᱮᱜᱼᱟ ᱤᱧ ᱫᱚ ᱚᱱᱟ ᱟᱹᱜᱩ ᱩᱛᱟᱹᱨ ᱠᱮᱜᱟᱹᱧ ᱾ ᱢᱮᱱᱠᱷᱟᱱ ᱜᱩᱜᱚᱞ ᱵᱟᱵᱚᱛ ᱡᱩᱫᱤ ᱵᱚᱱ ᱢᱮᱱ ᱠᱷᱟᱱ ᱚᱱᱟ ᱞᱟᱹᱜᱤᱫ ᱟᱹᱰᱤ ᱪᱷᱩᱴᱟᱹᱣ ᱦᱩᱭᱩᱜ ᱠᱟᱱᱟ ᱾ ᱱᱚᱠᱟ ᱜᱮ ᱛᱚᱨᱡᱚᱢᱟ ᱟᱨ ᱣᱮᱞᱤᱰᱮᱥᱚᱱ ᱠᱚ ᱮᱢᱟᱱ ᱠᱚ ᱠᱚᱨᱟᱣ ᱢᱟᱸ ᱵᱚᱱ ᱾ ᱚᱠᱛᱚ ᱢᱟᱸ ᱞᱟᱜᱟᱣᱜ ᱜᱮᱭᱟ ᱢᱮᱱᱠᱷᱟᱱ ᱪᱮᱫ ᱦᱚᱸ ᱪᱮᱫ ᱦᱚᱸ ᱡᱤᱱᱤᱥ ᱱᱚᱶᱟ ᱡᱮᱜᱮᱛ ᱨᱮ ᱵᱟᱹᱱᱩᱜᱼᱟ ᱡᱟᱦᱟᱸ ᱫᱚ ᱵᱟᱭ ᱜᱟᱱᱚᱜᱼᱟ ᱾ᱤᱧ ᱢᱟᱸ ᱵᱚᱴᱟᱱᱤ ᱵᱟᱞᱟ ᱠᱟᱹᱱᱟᱹᱧ (ᱡᱤᱣ ᱥᱟᱮᱬᱥ) ᱮᱱᱰ ᱨᱮᱦᱚᱸ ᱱᱚᱶᱟ ᱠᱚᱨᱮ ᱪᱷᱩᱴᱟᱹᱣᱜ ᱠᱟᱹᱱᱟᱹᱧ ᱪᱮᱫᱜ ᱥᱮ ᱤᱧ ᱨᱤᱱ ᱜᱤᱫᱽᱨᱟᱹ ᱦᱚᱸᱠᱚ ᱛᱟᱭᱚᱢ ᱛᱮ ᱠᱚ ᱞᱟᱵᱷᱚᱜᱼᱟ ᱟᱨ ᱵᱟᱠᱤ ᱥᱟᱱᱛᱟᱲᱤ ᱯᱟᱹᱴᱷᱩᱣᱟᱹ ᱠᱚ ᱫᱚ ᱟᱹᱰᱤ ᱜᱟᱱ ᱠᱚ ᱞᱟᱵᱷᱚᱜᱼᱟ ᱾

11th August 2024

ᱟᱹᱰᱤ ᱨᱟᱹᱥᱠᱟᱹ ᱨᱮᱭᱟᱜ ᱠᱟᱛᱷᱟ ᱠᱟᱱᱟ ᱡᱮ ᱱᱤᱛᱚᱜ ᱜᱩᱜᱚᱞ ᱛᱚᱨᱡᱚᱢᱟ ᱨᱮ ᱥᱟᱱᱛᱟᱲ ᱠᱚ ᱥᱮᱞᱮᱫ ᱠᱮᱫᱟ ᱾ ᱢᱮᱱᱠᱷᱟᱱ ᱱᱤᱛᱚᱜ ᱫᱚ ᱠᱷᱟᱹᱞᱤ roman ᱛᱮᱜᱮ ᱫᱮᱠᱷᱟᱣ ᱮᱫᱟᱭ ᱾ ᱵᱷᱚᱵᱤᱥᱚᱛ ᱨᱮ ᱯᱟᱞᱮ ᱚᱞ ᱪᱤᱠᱤ ᱠᱚ ᱥᱮᱞᱮᱫ ᱟ ᱾ ᱜᱩᱜᱚᱞ ᱛᱚᱨᱡᱚᱢᱟ ᱵᱟᱵᱚᱛ Twitter ᱥᱮ X ᱨᱮ ᱟᱹᱰᱤᱜᱚᱱ ᱯᱟᱱᱛᱮ ᱦᱩᱭᱮᱱᱟ ᱡᱮ ᱪᱮᱫ ᱪᱤᱠᱟᱹ ᱛᱮ ᱦᱩᱭᱩᱜᱼᱟ ᱾ ᱢᱮᱱᱠᱷᱟᱱ ᱜᱩᱜᱚᱞ ᱨᱮ ᱠᱟᱹᱢᱤ ᱠᱟᱱ ᱢᱤᱫ ᱦᱚᱲ ᱥᱟᱞᱟᱜ ᱠᱟᱛᱷᱟ ᱦᱩᱭ ᱮᱱᱟ, ᱟᱞᱮ ᱨᱤᱱ ᱦᱚᱲ ᱠᱚᱦᱚᱸ ᱥᱚᱢᱯᱚᱨᱠ ᱠᱮᱫᱮᱭᱟᱠᱮ ᱾ ᱩᱱᱤ ᱞᱟᱹᱭ ᱠᱮᱫᱟ, ᱚᱞ ᱪᱤᱠᱤ ᱨᱮ ᱠᱟᱹᱢᱤ ᱪᱟᱞᱟᱜ ᱠᱟᱱᱟ ᱾ ᱢᱮᱱᱠᱷᱟᱱ ᱚᱠᱛᱚ ᱞᱟᱜᱟᱣᱜᱼᱟ ᱢᱮᱱᱛᱮ ᱞᱟᱹᱭ ᱠᱮᱫᱟᱭ ᱾ ᱱᱚᱶᱟ ᱪᱤᱛᱟᱹᱨ ᱨᱮ ᱯᱮ ᱧᱮᱞ ᱫᱟᱲᱮᱭᱟᱜᱼᱟ ᱠᱟᱱᱟ, ᱱᱤᱛᱚᱜ ᱫᱚ ᱠᱷᱟᱹᱞᱤ roman ᱛᱮᱜᱮ ᱱᱟᱦ ᱫᱮᱠᱷᱟᱣᱮᱫᱟᱭ ᱾

ᱛᱤᱱᱟᱜ ᱜᱟᱱ ᱟᱹᱭᱟᱹᱛ ᱨᱮᱫᱚ ᱟᱹᱰᱤ ᱵᱟᱱᱴᱷᱤᱠ ᱛᱮᱞᱟ ᱱᱟᱦ ᱫᱮᱠᱷᱟᱣ ᱮᱫᱟᱭ ᱾

ᱱᱤᱛ ᱠᱷᱚᱱ ᱜᱮ ᱚᱞ ᱪᱤᱠᱤ ᱛᱮ ᱛᱮᱞᱟᱠᱚ ᱧᱮᱞ ᱥᱟᱱᱟᱢ ᱠᱱᱟ ? ᱢᱮᱱᱠᱷᱟᱱ ᱢᱤᱫᱴᱟᱹᱝ ᱯᱨᱚᱜᱽᱨᱟᱢ ᱛᱮᱭᱟᱨ ᱠᱟᱹᱫᱟᱹᱧ, ᱚᱱᱟ ᱫᱚ ᱣᱮᱵᱽᱥᱟᱭᱤᱴ ᱞᱮᱠᱷᱟ ᱢᱮᱱᱟᱜ ᱠᱟᱫᱟ ᱾ ᱚᱱᱟ ᱣᱮᱵᱽᱥᱟᱭᱤᱴ ᱨᱮ ᱪᱟᱞᱟᱣ ᱠᱟᱛᱮ roman ᱛᱚᱨᱡᱚᱢᱟ paste ᱞᱮᱠᱷᱟᱱ ᱚᱞ ᱪᱤᱠᱤ ᱛᱮ convertᱚᱜᱼᱟ ᱾ ᱠᱳᱰ ᱨᱮᱭᱟᱜ ᱥᱨᱚᱛ ᱫᱚ github ᱨᱮ ᱢᱮᱱᱟᱜ ᱠᱟᱫᱟ ᱾

19th October 2024

ᱟᱹᱰᱤ ᱨᱟᱹᱥᱠᱟᱹ ᱨᱮᱭᱟᱜ ᱠᱟᱛᱷᱟ ᱠᱟᱱᱟ ᱡᱮ ᱱᱤᱛᱚᱜ ᱜᱩᱜᱚᱞ ᱛᱚᱨᱡᱚᱢᱟ ᱣᱮᱵᱽᱥᱟᱭᱤᱴ ᱨᱮ ᱚᱞ ᱪᱤᱠᱤ ᱡᱟᱭᱜᱟ ᱧᱟᱢ ᱠᱮᱫᱟᱭ ᱾ ᱦᱚᱞᱟ ᱠᱟᱹᱨᱤᱭᱟᱹ ᱵᱚᱭᱦᱟ (ᱥᱟᱱᱛᱟᱲᱤ ᱣᱤᱠᱤᱢᱤᱰᱤᱭᱟᱱ) ᱣᱷᱟᱴᱥᱟᱯ ᱢᱮᱥᱮᱡᱽ ᱞᱮᱫᱟᱭ ᱚᱱᱟ ᱯᱟᱲᱦᱟᱣ ᱛᱮ ᱵᱟᱰᱟᱭ ᱦᱩᱭᱮᱱᱟ, ᱟᱨ ᱚᱱᱟ ᱯᱚᱥᱴ ᱯᱷᱲᱦᱟᱣ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹ ᱜᱮ ᱵᱩᱡᱷᱟᱹᱣ ᱮᱱᱟ ᱾ 2ᱼ3 ᱥᱮᱨᱢᱟ ᱠᱷᱚᱱ ᱞᱮ ᱪᱷᱩᱴᱟᱹᱣᱜ ᱠᱟᱱ ᱛᱟᱦᱮᱸᱡ, ᱟᱭᱢᱟ ᱦᱚᱲ ᱠᱚᱣᱟᱜ ᱮᱱᱮᱢ ᱱᱚᱶᱟ ᱨᱮ ᱢᱮᱱᱟᱜ ᱠᱟᱫᱟ, ᱯᱤᱝᱠᱤ ᱦᱟᱸᱥᱫᱟ, ᱵᱤᱡᱮᱱᱫᱽᱨᱚ ᱵᱟᱥᱠᱮ, ᱵᱚᱫᱤ ᱵᱟᱥᱠᱤ, ᱤᱱᱫᱽᱨᱚᱡᱤᱛ ᱢᱩᱨᱢᱩ, ᱯᱨᱮᱢᱪᱟᱸᱫ ᱢᱩᱨᱢᱩ, ᱥᱩᱠᱩ ᱢᱩᱨᱢᱩ, ᱨᱟᱢᱡᱤᱛ ᱴᱩᱰᱩ ᱟᱨ ᱡᱷᱚᱛᱚ ᱠᱷᱚᱱ ᱰᱷᱮᱨ ᱥᱟᱨᱦᱟᱣ ᱟᱹᱠᱤᱱ ᱠᱟᱹᱱᱟᱹᱧ ᱚᱥᱣᱤᱱᱤ ᱜᱚᱢᱠᱮ, ᱟᱹᱠᱤᱱ ᱠᱷᱟᱹᱛᱤᱨ ᱟᱭᱢᱟᱸ educational institution ᱥᱟᱞᱟᱜ ᱡᱚᱲᱟᱣ ᱦᱩᱭ ᱞᱮᱱᱟ ᱾ ᱟᱨ ᱡᱟᱦᱟᱸᱭᱠᱚ ᱡᱩᱫᱤ ᱦᱤᱲᱤᱧᱮᱫ ᱯᱮ ᱠᱷᱟᱱ ᱤᱠᱟᱹ ᱠᱷᱚᱡᱚᱜ ᱠᱟᱹᱱᱟᱹᱧ ᱾ ᱚᱜᱚᱥᱴ ᱪᱟᱸᱫᱚ ᱨᱮ ᱢᱚᱱᱮ ᱫᱩᱠᱮᱱᱛᱟᱞᱮᱭᱟ, ᱪᱮᱫᱟᱜ ᱥᱮ ᱢᱟᱲᱟᱝ ᱫᱚ ᱠᱷᱟᱹᱞᱤ roman ᱛᱮᱜᱮ ᱫᱮᱠᱷᱟᱣᱮᱫ ᱛᱟᱦᱮᱸᱡᱠᱚ ᱾ ᱵᱷᱚᱵᱤᱥᱚᱛ ᱨᱮ ᱯᱟᱞᱮ ᱚᱞ ᱪᱤᱠᱤ ᱠᱚ ᱥᱮᱞᱮᱫ ᱟ ᱢᱮᱱᱛᱮ ᱢᱚᱱᱮ ᱞᱮᱱᱟ, ᱟᱨ ᱜᱩᱜᱚᱞ ᱴᱤᱢ 2 ᱥᱮᱨᱢᱟ ᱜᱟᱱ ᱞᱟᱜᱟᱣᱜᱼᱟ ᱢᱮᱱᱮᱫ ᱛᱟᱦᱮᱸᱡᱠᱚ ᱾ ᱢᱮᱱᱠᱷᱟᱱ ᱵᱟᱨ ᱪᱟᱸᱫᱚ ᱵᱷᱤᱛᱤᱨ ᱨᱮ ᱴᱟᱴᱠᱟ ᱚᱰᱚᱠ ᱠᱟᱛᱮ ᱦᱟᱦᱲᱟ ᱪᱷᱚᱠᱤᱫᱤᱧᱟᱭ ᱜᱩᱜᱚᱞ ᱾

ᱱᱤᱛᱚᱜ ᱚᱞ ᱪᱤᱠᱤ ᱛᱮ ᱜᱩᱜᱚᱞ ᱛᱚᱨᱡᱚᱢᱟ ᱵᱟᱹᱲᱛᱤ ᱠᱷᱚᱱ ᱵᱟᱹᱲᱛᱤ ᱵᱮᱵᱷᱟᱨ ᱢᱟᱸ ᱵᱚᱱ ᱾

ᱣᱮᱵᱽᱥᱟᱭᱤᱴ ᱛᱚᱨᱡᱚᱢᱟ ᱦᱚᱸ ᱜᱟᱱᱚᱜᱼᱟ ᱾

ᱣᱮᱵᱽᱥᱟᱭᱤᱴ ᱴᱮᱵᱽᱨᱮ ᱪᱟᱞᱟᱣ ᱠᱟᱛᱮ ᱯᱟᱹᱨᱥᱤ ᱵᱟᱪᱷᱟᱣ ᱢᱮ ᱟᱨ ᱛᱚᱨᱡᱚᱢᱟ ᱨᱮ ᱚᱛᱟᱭ ᱢᱮ ᱾ ᱢᱮᱱᱠᱷᱟᱱ ᱱᱟᱶᱟ ᱴᱮᱵᱽ ᱨᱮ ᱣᱮᱵᱽᱥᱟᱭᱤᱴ ᱛᱚᱨᱡᱚᱢᱟ ᱠᱟᱛᱮ ᱫᱮᱠᱷᱟᱣᱟᱭ ᱾
Text to Speech ᱦᱚᱸ ᱜᱟᱱᱚᱜ ᱠᱟᱱᱟ

ᱚᱞ ᱠᱷᱚᱱ ᱥᱮᱰᱮ ᱱᱤᱛᱚᱜ ᱠᱷᱟᱹᱞᱤ Android app (Google translate) ᱨᱮᱜᱮ ᱠᱟᱹᱢᱤ ᱮᱫᱟᱭ (ᱠᱷᱟᱹᱞᱤ English-Santali ᱨᱮᱜᱮ) ᱾ ᱛᱟᱭᱚᱢ ᱛᱮ ᱵᱷᱮᱜᱟᱨ ᱯᱟᱹᱨᱥᱤ ᱡᱚᱲᱟ ᱟᱨ ᱣᱮᱵᱽᱥᱟᱭᱤᱴ ᱨᱮᱦᱚᱸ ᱯᱟᱞᱮᱠᱚ ᱥᱮᱞᱮᱫᱟ ᱾

OCR

ᱚᱱᱟ ᱨᱮᱭᱟᱜ support ᱱᱤᱛᱚᱜ ᱵᱟᱹᱱᱩᱜ ᱠᱟᱫᱟ ᱾ ᱚᱱᱟ ᱞᱟᱹᱜᱤᱫ ᱢᱤᱫᱴᱟᱹᱝ data collection campaign ᱠᱚᱨᱟᱣ ᱞᱟᱹᱠᱛᱤ ᱠᱟᱱᱟ ᱾ ᱡᱟᱦᱟᱸ ᱫᱚ ᱦᱟᱹᱡᱩᱜ ᱠᱟᱱ ᱥᱮᱨᱢᱟ ᱨᱮ ᱡᱩᱨ ᱥᱩᱨ ᱛᱮ ᱠᱚᱨᱟᱣ ᱦᱩᱭᱩᱜᱼᱟ ᱾

ᱱᱤᱛᱚᱜ ᱫᱚ ᱢᱤᱫᱴᱟᱹᱝ ᱱᱟᱶᱟ Milestone ᱵᱚᱱ ᱧᱟᱢ ᱠᱮᱫᱟ, ᱟᱹᱰᱤᱵᱷᱚᱨᱟ ᱠᱟᱹᱢᱤ ᱱᱤᱛᱚᱜ ᱠᱚᱨᱟᱣ ᱵᱟᱠᱤ ᱢᱮᱱᱟᱜᱼᱟ ᱾ ᱤᱧ ᱴᱷᱮᱱ ᱢᱤᱫᱴᱟᱹᱝ formulae ᱢᱮᱱᱟᱜ ᱠᱟᱫᱟ ᱺ ᱥ.ᱛ.ᱟ ᱼ ᱥᱮᱛᱟᱜ, ᱛᱤᱠᱤᱱ ᱟᱨ ᱟᱹᱭᱩᱵ ᱾ ᱱᱚᱶᱟ ᱯᱟᱧᱡᱟ ᱢᱟᱸ ᱵᱚᱱ Google Translate ᱥ.ᱛ.ᱟ ᱛᱮ ᱵᱮᱵᱷᱟᱨ ᱞᱮᱠᱷᱟᱱ Google feedback ᱵᱚᱱ ᱮᱢ ᱫᱟᱲᱮ ᱟᱭᱟ ᱾ ᱢᱟᱸ ᱛᱚᱵᱮ ᱛᱮᱦᱮᱸᱧ ᱞᱟᱹᱜᱤᱫ ᱤᱱᱟᱹᱜ ᱜᱮ ᱾ ᱥᱟᱹᱜᱩᱱ ᱧᱤᱱᱫᱟᱹ ᱡᱚᱦᱟᱨ 🙏🙏᱾